တနင်္သာရီတိုင်း မြိတ်ကျွန်းစုသို့ စည်းရုံးရေးခရီးစဉ် ထွက်ခွာလာစဉ် ဒေါ်အောင်ဆန်းစုကြည် လိုက်ပါသွားသော ရေယာဉ်သည် အပြန်ခရီးတွင် သောင်တင်သွားခြင်းကြောင့် မြိတ်မြို့သို့ ညမိုးချုပ်တွင်မှ ပြန်လည်ရောက်ရှိသွားကြောင်း ခရီးစဉ်တွင် လိုက်ပါသွားသူ သတင်းထောက် တစ်ဦးမှ ပြောကြားသည်။
ဧပြီလ ၁ ရက်နေ့တွင် ကျင်းပမည့် ကြားဖြတ်ရွေးကောက်ပွဲ မဲဆွယ်စည်းရုံးရေး ခရီးစဉ်အဖြစ် မတ်လ ၂၄ ရက်နေ့က မြိတ်ကျွန်းစုများသို့ စည်းရုံးရေးခရီးစဉ်ထွက်ခွာရန် စီစဉ်ထားသောခရီးစဉ်တွင် အမြန်ရေယာဉ် ငှားရမ်းမှု မရရှိသဖြင့် ရရှိသော ရေယာဉ်ဖြင့် ခရီးစဉ်သွားရောက်စဉ် အချိန်နှောင့်နှေးမှုကြောင့် စခန်းသစ် ကျွန်းစုသို့သာ သွားရောက်နိုင်ခဲ့ပြီး ကန်ပေါ်သို့ သွားရောက်ခြင်းမပြုခဲ့ဘဲ စခန်းသစ်မှ ပြန်လည် ထွက်ခွာလာစဉ် အပြန်လမ်းခရီးတွင် ဒေါ်အောင်ဆန်းစုကြည် လိုက်ပါလာသော ရေယာဉ်သည် သောင်တင်မှု ဖြစ်ပွားခဲ့သောကြောင့် ည ၁၀ နာရီဝန်းကျင်မှ မြိတ်မြို့သို့ ပြန်လည်ရောက်ရှိခဲ့ကြောင်း သိရသည်။
ဒေါ်အောင်ဆန်းစုကြည်သည် မြိတ်မြို့မှ ရန်ကုန်မြို့သို့ မတ်လ ၂၅ ရက်နေ့ညတွင် ပြန်လည် ရောက်ရှိခဲ့ပြီး ကျန်းမာရေး အခြေအနေကြောင့် မတ်လ ၂၇ ရက်နေ့နှင့် မတ်လ ၂၈ ရက်နေ့များတွင် မကွေးသို့သွားရောက်မည့် စည်းရုံးရေးခရီးစဉ် ထွက်ခွာရန် စီစဉ်ထားခြင်းအား ဖျက်သိမ်းကြောင်း အမျိုးသား ဒီမိုကရေးစီအဖွဲ့ချုပ် ရွေးကောက်ပွဲအောင်နိုင်ရေးအဖွဲ့မှ မတ်လ ၂၅ ရက်နေ့တွင် ထုတ်ပြန်လိုက်သည်။
No comments:
Post a Comment