ဘတ်(စ်)ကားစီးရာတွင် ကြိုတင်ငွေဖြည့်ကတ် Ipay ကတ်ဖြင့် ငွေပေးချေခြင်းကို ဧပြီ ၂ ရက်နေ့မှစတင်ကာ ပါရမီ အဓိပတိ (အပြာ) ယာဉ်လိုင်းတွင် စတင်စမ်းသပ်မည်ဖြစ်ကြောင်း ပါရမီယာဉ်လိုင်းမှ မိုလ်မှူးကြီးမျိုးမြင့်(ငြိမ်း) ကပြောကြားသည်။ ကစ္စပနဒီနှင့် ပါရမီယာဉ်လိုင်းတို့ ပူးပေါင်း၍ ဘတ်(စ်)ကားစီးရာတွင် ကြိုတင်ငွေဖြည့်ကတ်ဖြင့် ငွေပေးချေခြင်းလုပ်ငန်းကို အကောင်အထည်ဖော်ရန် ပါရမီအဓိပတိ(အပြာ)ယာဉ်လိုင်းမှ ယာဉ်နောက်လိုက်များကို မတ်လ ၁၇ ရက်နေ့မှစတင်ကာ စက်အသုံးပြုနည်းများကို သင်ကြားလျက်ရှိပြီး ဧပြီလ ၂ ရက်နေ့မှစတင်ကာ အဓိပတိ (အပြာ)ယာဉ်လိုင်းမှကား ၁၀ စီးတွင်စတင်စမ်းသပ်မည်ဖြစ်ကြောင်း သိရသည်။
ကြိုတင်ငွေဖြည့်ကတ် Ipay ကတ်များကို ယာဉ်နောက်လိုက်များနှင့် Ipay ကတ်အရောင်း ကောင်တာများတွင် ဝယ်ယူနိုင်ပြီး ပထမဆုံးဝယ်ယူသောကတ်ကို ၁၀၀၀ ကျပ်ဖြင့်စတင်ရောင်းချမည်ဖြစ်ပြီး ကတ်တန်ဖိုး ၃၀၀ နှင့် သုံးစွဲနိုင်သောငွေ ၇၀၀ ကျပ်ထည့်သွင်းပေးထားမည်ဖြစ်ပြီး ငွေထပ်မံဖြည့်သွင်းလိုသူများအနေဖြင့် ယာဉ်နောက်လိုက်များနှင့် Ipay ကတ်အရောင်းကောင်တာများတွင် ၁၀၀၀ မှ ၅၀၀၀ ကျပ်အထိ ထည့်သွင်းနိုင်ပြီး ၅၀၀၀ ကျပ်နှင့် အထက်ထည့်သွင်းမည်ဆိုပါက လျှို့ဝှက်နံပါတ်အား ရိုက်သွင်းရန်လိုအပ်ပြီး ငွေပမာဏအများဆုံး တစ်သိန်းကျပ်အထိ ကတ်ထဲတွင်ထည့်သွင်းထားနိုင်သည်ဟု ဆိုသည်။
ကစ္စပနဒီမှ တာဝန်ရှိသူတစ်ဦးက “ Ipay ကတ်စတင်ဝယ်ယူသူများအနေနဲ့ ကတ်ဝယ်ယူပြီးပါက မိမိကတ်ထဲမှာထည့်ထားတဲ့ပိုက်ဆံ လုံ့ခြုံရေးအတွက် နီးစပ် Ipay ကတ်အရောင်းကောင်တာများတွင် မူလကုတ်နံပါတ် 1234 ကို မိမိနှစ်သက်ရာ ကုတ်သို့ ပြောင်းလဲရန်အရေးကြီးတယ်၊ ကတ်ဝယ်ပြီး ၃ လ အသုံးမပြုဘဲထားရင် ကတ်အသုံးပြုမှုပိတ်သွားမှာဖြစ်ပြီး ပြန်လည်အသုံးပြုလိုပါက နီးစပ်ရာ Ipay ကတ်အရောင်းကောင်တာများတွင် ကုတ်နံပါတ်ပြန်လည်ရိုက်ထည့်ပြီး ကတ်အသုံးပြုခွင့်ပြန်လည် ဖွင့်လှစ်ရမှာဖြစ်တယ်” ဟု ပြောကြားသည်။
ဧပြီလ ၂ ရက်နေ့တွင် အဓိပတိ(အပြာ) ယာဉ်လိုင်း ၁၀ စီးတွင်းစတင်စမ်းသပ်မည့် Ipay ကတ်ဖြင့်ငွေပေးချေသည့် စနစ်တွင် ယာဉ်စီးခဘောင်ချာကိုစက်မှထုတ်ပေးမည်ဖြစ်ပြီး ထိုဘောင်ချာအား ခရီးသည်များမှသိမ်းထားရန်လိုအပ်ပြီး ဘောင်ချာနံပါတ်ဖြင့် ကံစမ်းမဲပြန်လည်ပေးအပ်သွားမည်ဖြစ်ကြောင်း ပါရမီယာဉ်လိုင်းမှ တာဝန်ရှိသူတစ်ဦးက ပြောကြားသည်။
No comments:
Post a Comment