မြန်မာနိုင်ငံမှ ပြည်ပနိုင်ငံများသို့ အကြောင်းအမျိုးမျိုးကြောင့် ရောက်ရှိနေသော မြန်မာနိုင်ငံသား ၂၃ သိန်းကျော်ရှိသည့် အနက် နေရပ်ပြန်လည်လာရောက်လိုသူများအတွက် အလုပ်အကိုင်အခွင့်အလမ်းများ ဖန်တီးပေးသွားမည်ဖြစ်ကြောင်း ပြည်ထောင်စုငြိမ်းချမ်းရေးဖော်ဆောင်မှုအဖွဲ့ခေါင်းဆောင် ဦးအောင်မင်းက မတ်လ ၇ ရက်နေ့တွင်ပြုလုပ်သော ကရင်နီအမျိုးသား တိုးတက်ရေးပါတီနှင့် အပစ်အခတ်ရပ်စဲရေးလက်မှတ်ထိုးပွဲအပြီး ပြုလုပ်သော သတင်းစာရှင်းလင်းပွဲတွင် ပြောကြားသည်။
ပြည်ပနိုင်ငံများသို့ ရောက်ရှိနေသော မြန်မာနိုင်ငံသားများ နေရပ်ပြန်အလုပ် လုပ်ကိုင်နိုင်ရန် နယ်စပ်ဒေသများတွင် စက်မှုဇုန်များထူထောင်ပြီး စက်ရုံအလုပ်ရုံများတည်ဆောက်သွားမည်ဖြစ်ရာ အလုပ်သမားအများအပြား အလုပ်ကိုင်အခွင့် အလမ်းရရှိစေနိုင်သော စက်ရုံများကို ဦးစားပေးတည်ဆောက်သွားမည်ဖြစ်ပြီး အခြားနိုင်ငံများမှ စက်ရုံများကဲ့သို့ နယ်စပ်ဒေသများတွင် စက်ရုံများလာရောက်ဖွင့်လှစ်ရန် နိုင်ငံခြားလုပ်ငန်းရှင်များအား ကမ်းလှမ်းထားပြီး အခြားနိုင်ငံများနည်းတူ လုပ်ကိုင်ဆောင်ရွက်ခွင့်များ ပေးသွားမည်ဖြစ်ကြောင်း ထည့်သွင်းပြောကြားခဲ့သည်။
“ ထိုင်းနိုင်ငံမှာရှိတဲ့စက်ရုံတွေမှာ အလုပ်လုပ်ကိုင်နေကြတဲ့ မြန်မာနိုင်ငံသားတွေဟာ တစ်နေ့ကို ဘတ် ၈၀ ကနေ ၁၂၀ ကြားရနေပါတယ်။ ဒီအချိန်မှာ ထိုင်းနိုင်ငံသားတစ်ဦးရဲ့လုပ်ခက အနည်းဆုံး ဘတ်၂၀၀ ရရှိနေတယ် ဒါကြောင့် မြန်မာနိုင်ငံသားတွေအနေနဲ့ ဒီမှာဘတ် ၂၀၀ ရမယ်ဆိုရင် အဆင်ပြေတာပေါ့” ဟု ဦးအောင်မင်းက ဆိုသည်။
ပြည်ထောင်စုငြိမ်းချမ်းရေးဖော်ဆောင်မှုအဖွဲ့ ဒုတိယအဖွဲ့ခေါင်းဆောင် ဦးစိုးသိန်းက ၄င်းတို့အဖွဲ့အနေနှင့် ယခုအချိန်တွင် ဆောင်ရွက်ပေးနိုင်သည်မှာ နယ်စပ်ဒေသများသို့ ရောက်ရှိနေသော ဒုက္ခသည်များ နေရပ်ပြန်အလုပ်လုပ်ကိုင်နိုင်ရန်အတွက် နပ်စပ်ဒေသများတွင် အသေးစားနှင့် အလတ်စား စက်မှုလုပ်ငန်းများ ဖော်ဆောင်ပေးသွားမည်ဖြစ်ကြောင်း ကရင်နီအမျိုးသားတိုးတက်ရေးပါတီနှင့် ပြည်နယ်အဆင့် ငြိမ်းချမ်းရေးဆွေးနွေးပွဲတွင် ကတိပြု ပြောကြားခဲ့သည်။
မြန်မာနိုင်ငံမှ ပြည်ပနိုင်ငံများသို့ရောက်ရှိနေသူ ၂၃ သိန်းကျော်တွင် ကာလကြာရှည်စွာဖြစ်ပွားခဲ့သော ပြည်တွင်း စစ်ပွဲများကြောင့် နေရပ်ဒေသများတွင် လုံခြုံမှုမရှိသဖြင့် ထွက်ပြေးတိမ်းရှောင်နေသူ ၄၄၆,၀၀၀ ကျော်၊ နယ်စပ်ဒေသများရှိ ဒုက္ခသည်စခန်းများတွင် ၃၄၆,၀၀၀ကျော်နှင့် အကြောင်းအမျိုးမျိုးကြောင့် ပြည်ပနိုင်ငံများတွင် သွားရောက်အလုပ်လုပ်ကိုင်နေသူ ၂ သန်းကျော်ရှိကြောင်း ၎င်းတို့၏အဆိုအရ သိရသည်။
